FRENTE REVOLUCIONÁRIA DE TIMOR-LESTE INDEPENDENTE (FRETILIN)

Dili, Sept. 11, 1974 (48 years old)

Frente Revolucionaria de Timor-Leste Independente – FRETILIN, hahú moris ho fundasaun Asosiasaun Social-Demokrata Timorense ne’ebé harii iha loron-20 fulan-Maiu tinan-1974. Fulan 3 hafoin ninia kriasaun, ASDT disolve tiha no harii fila fali FRETILIN iha loron-11 fulan-Setembru tinan-1974.

FRETILIN harii nu’udár resposta ba neseidade atu hamosu organizasaun ida ho karaterístika movimentu ka frente Libertasaun Nasional ida, ne’ebé lori responsabilidade boot atu lidera no lori povu Timor-Leste luta ba Ukun Rasik An no atu defende povu no País nia vida hasoru ameasa invazaun husi rejime Indonesia. Nune’e, FRETILIN, mosu nu’udár movimentu nasionalista dahuluk iha Timor-Leste iha ámbitu no dezenvolvimentu polítika iha tinan-1974.

FRETILIN mosu nu’udár organizasaun ida “...ne’ebé reúni forsa nasionalista no anti-kolonialista sira hotu iha Timor-Leste ho objetivu komum ida: povu Timor-Leste nia libertasaun husi opresaun kolonialista sira nian.” FRETILIN mós defini atu “lori Povu Timor-Leste atu hahu lao iha dalan ba progresu, páz no Liberdade.  FRETILIN rejeita kualker forma kolonializmu no neokolonializmu ho finalidade ida iha ne’ebé Povu Timor-Leste bele hetan duni Ukun Rasik An lolós, Livre no Prósperu ….”

Iha fulan-Novembru tinan-1975 nia laran, Komite Central FRETILIN nian deside atu halo teritoriu kolonial ida ne’ebé mak abandonadu atu sai Esetadu ida Independente. Ba ida ne’eduni mak iha loron-28 fulan-Novembru tinan-1975 FRETILIN halo proklamasaun unilateral ba Repúblika Demokrátika Timor-Leste nia Independensia, antes invazaun husi rejime Indonesia nian.

FRETILIN partidu polítiku ida iha Timor-Leste ne’ebé mak hamrik ho hakarak atu defende independensia no garante soberania nasional. FRETILIN hakarak atu harii rejime direitu demokrátiku ida ne’ebé mak hatúr iha justisa sosial, toleransia polítika no iha hadiak povu nia moris no iha ne’ebé ema Timor oan hotu-hotu iha fatin atu hola parte iha Timor-Leste nia konstrusaun.

Hanesan forsa polítika ida, FRETILIN konserva ninia natureza frentista. FRETILIN kontra forma dominasaun no opresaun kolonial, neo-kolonial no expansionista. FRETILIN mós kontra forma saida deit husi explorasaun ekonómika, sosial, polítika ka militar ho baze ba prinsipiu sira humanista ninian; justisa sosial, demokrasia, liberdade, toleransia, progresu no independensia nasional.

Nu’udár forsa polítika ida, FRETILIN fiar no defende povu nia partisipasaun no kontrola ba jestaun ba povu nia interese iha nivel lokal, rejional no nasional. FRETILIN mós fiar no defende dezenvolvimentu ida ne’ebé mak integral no ekilibradu, ne’ebé mak akompaña ho kriasaun kondisaun humana no institusional ne’ebé bele fo kompetensia no poder ba autoridade no servisu sub-nasional sira.

FRETILIN fiar no defende demokrasia partisipativa, no fiar e defende mós katak rikusoin sira iha rai leten no iha rai okos, iha plataforma marítima no iha Timor-Leste nia zona ekonómika exkluzivu konstitui povu nia direitu sira no propriedade Estadu ida ne’ebé mak demokrátiku no Independente.

Dadauk ne’e, FRETILIN mak forsa polítika maioria iha Timor-Leste ne’ebé forma bankada parlamentár boot liu iha Parlamentu Nasional ho deputadu nain 23.

Husi tinan-2002 to’o tinan-2006, FRETILIN kontrola maioria absoluta iha Parlamentu Nasional no deputadu nain 55 husi total deputadu nain 88 iha Parlamentu Nasional. FRETILIN mak lidera Primeiru Governu Konstitusional ne’ebé hahú harii Eestadu Timor-Leste husi zero. Ho forsa maioria absoluta iha Asembleia Konstituinti ne’ebé mak hakerek Konstituisaun ida ne’ebé progresivu no modernu.

Iha governu no kontrola formsa maioria iha Parlamentu Nasional mak FRETILIN hamosu Lei Fundo Petrolíferu ne’ebé regula no rai osan ne’ebé mai husi Timor-Leste nia mina no gas iha tasi Timor. Fundo ida ne’eduni mak hahu husi tinan-2006/07 finansia Orsamentu Jeral Estadu tinan-tinan hodi hala’o Timor-Leste nia dezenvolvimentu iha seitor hotu-hotu.