info@fretilin.tl 3313017

CNRT La Simu Rezultadu Lakon Atu Hamosu Krize Foun

  • Publika husi: Medialuolo
  • Fatin no Loron: Luz Clarita, Dili, 18/Mar/2022

KOMUNIKADU IMPRENSA

---------------------------

CNRT SEI LA SIMU REZULTADU LAKON ATU HAMOSU KRIZE FOUN


Iha loron-17 marsu 2022, porta vóz rua husi kandidatu Prezidente Repúblika Ramos Horta, Dionisio Babo no Avelino Coelho, liuhsi konferénsia imprensa, koko bobar tun-sae opiniaun públika nu’udar dalan atu hamosu kondisaun ba CNRT atu la simu rezultadu lakon iha eleisaun Prezidente Repúblika, maski eleisaun rasik foin atu akontese iha 19 marsu 2022.


Ema la hakfodak katak derrepente de’it, CNRT muda lalais nia estratéjia kampaña bosok eleitór sira. Husi akuzasaun du’un-matak Prezidente Repúblika katak viola Konstituisaun sein fó-sai faktus, muda tiha ona ba duun-matak katak iha violasaun ba regras eleisaun ba Prezidente Repúblika. Ho estratéjia foun ne’e, ita bele haree katak CNRT sei lasimu rezultadu lakon iha eleisaun 19 marsu 2022.  


Ne’e hatudu katak CNRT nia atake hasoru kandidatu Prezidente Repúblika Francisco Guterres Lú Olo, la’ós de’it Tribunal Rekursu mak rejeita maibé CNRT hatene ona katak produtu ne’ebé CNRT hakarak faan, maioria povu lakoi sosa. Nune’e, estratéjia foun ne’ e sei laiha nia impaktu iha eleisaun aban.


Liuhusi sondajen ne’ebé media CNRT no GMN organiza rasik, sein regras, rezultadu polling nian fó rezultadu manán ba sira-nia kandidatu José Ramos Horta. Rezultadu as tebes ne’ e halo ema hamanasa tanba kandidatu Ramos Horta nunka manán iha primeira volta eleisaun prezidensial, biar hetan apoiu husi nia belun boot Xanana Gusmão. Eleitor ne’ebé la’ ós militante no simpatizante CNRT no la’ós apoiante kandidatu ba José Ramos Horta, kestiona sondajen ne’e, tanba la’ós prodús husi entidade independente ne’ebé hala’o tuir padraun sientífiku nian maibé hala’o fali husi GMN, TV ida ne’ebé sai tiha ona instrumentu polítiku CNRT ninian biar bosok públiku katak TV ne’e imparsiál.


Sondajen ne’e rasik mai ho objetivu surik ho matan ruak. Husi sorin ida, liuhusi sondajen bele hetan votus liután ba sira-nia kandidatu, maibé husi sorin seluk, prepara hela kondisaun atu la simu rezultadu eleisaun bainhira lakon iha primeira volta prezidensiál

Tanba fabrika dadaun kondisaun atu la simu rezultadu eleisaun Prezidente Repúblika nian, CNRT koko desakredita dadaun independénsia órgauns eleitorais nia serbisu atu nune’e, sira bele ezije Tribunal Rekursu atu anula eleisaun prezidensiál ida ne’ e.


CNRT uza sira nia TV GMN hodi hato’o akuzasaun falsa,, iha 17 marsu, katak apoiantes kandidatu Francisco Guterres Lú Olo halo provokasaun ba sira, liuhusi tuda sede CNRT no hakanek ema CNRT ida, no halo barrullu.


 Liuhusi konferénsia imprensa, quadru rua CNRT nian, Dionísio Babo no Avelino Coelho uza mós alegasaun katak sidadaun sira uza pil ajing gila, uza veíkulu la iha xapa matrikula no akuza partidu balun halo manipulasaun iha prosesu eleisaun ninian, halo terror, intimidasaun to’o fraude eleitoral.


Kona-ba akontesimentu iha sede CNRT, ema ida kanek, iha 16 marsu, Dionísio Babo, nu’ udar porta-vós kandidatu Prezidente Repúblika, Dionísio Babo, la barani hatete naran maibé públiku hatene katak sira hakarak duun apoiantes kandidatu Prezidente Repúblika Francisco Guterres Lú Olo mak halo provokasaun no barullu iha sede CNRT ninian.  


Maibé video ne’ebé fó –sai iha media sosiál  

hatudu momos apoiantes rua Lu Olo nian mak liu ho motorizada iha estrada públika. Tuir video gravasaun ba akontesimentu ne’ebé espalla iha media sosial hatudu momoos katak se mak tuda no hakanek militante CNRT mak ema ida ne’ebe militante ka simpatizante CNRT , la’ós apoiante kandidatu Lú Olo. 


Tanba video hatudu lia loos, ekipa susesu ezije ba partidu CNRT atu husu deskulpa tanba CNRT uza akuzasaun falsu tanba hakarak hodi biit hafoer naran partidu FRETILIN nian.

 Ezije ba porta-voz Dionísio Babo atu brane fó –sai sá partidu polítiku ka responsáveis mak uza pil ajing gila, uza veíkulu la iha xapa matrikula no halo manipulasaun iha prosesu eleisaun ninian, halo terror, intimidasaun to’o fraude eleitoral.


Ekipa susesu Lú Olo fó fiar ba PNTL atu halo investigasaun klean ba kazu iha sede CNRT no akuzasaun falsu hotu hafoin eleisaun prezidensial atu hatene lia loos.


Boletin falsu mosu dadaun iha rede sosiál no iha ona alegasaun katak boletim balun iha koak ka marka, atu tenta konvense ema katak sei iha frade eleitoral. Ne’e mos halo parte estratéjia husi sira ne’ebé lakoi simu rezultadu eleitorál bainhira lakon. 


Ami apela ba militantes, simpatizantes, apoiantes no ba povu tomak atu vota iha 19 marsu, vota ho dame. 


Atu hatene tan informasaun, favor kontakta ho reprezentante kandidatu Lú Olo, Fernando Gusmão, tel 77999570 

Dili, 18 marsu 2022