KOMUNIKADU IMPRENSA

-------------------------------------

KANDIDATU PREZIDENTE REPÚBLIKA FRANCISCO GUTERRES LÚ OLO SEI PARTISIPA IHA DEBATE ORGANIZA HUSI CNE

Díli, 15 marsu 2022

Kandidatu ba  Prezidente Repúblika ba mandatu 2022-2027,  Francisco Guterres Lú Olo sei partisipa iha debate ne’ebé organiza husi Comissão Nacional de Eleições (CNE)ba ohin kalan, 15 marsu 2022.

Tanba iha interese atu partisipa iha debate ne’e mak horseik, iha 14 marsu 2022, reprezentante legál kandidatu Prezidente Repúblika Fernando Dias Gusmão partisipa iha enkontru preparativu iha Hotel El Legendario, fatin  ne’ebé sei  hala’o transmisaun direta husi GMN.

Horseik kedas kandidatu Lú Olo  hetan malu ho reprezentante Fernando Dias Gusmão hodi hatene kona-ba preparativus husi GMN no CNE kona-ba debate ne’e.

Biar iha protestu ba  oinsá CNE organiza debate ida ne’e, kandidatu Prezidente Repúblika ho númeru 6  hakarak uza oportunidade ohin nian hodi hato’o ninia kompromisu polítiku no hatán pergunta ne’ebé de’it  ne’ebé Komisaun Organizadora prepara tiha ona.

Ekipa Susesu kandidatu Prezidente Repúblika Francisco Guterres Lú Olo hala’o protestu hasoru CNE relasiona ho hili GMN, empreza televiziva privada, ne’ebé  responsabiliza ba transmisaun direta debate kandidatu Prezidente Repúblika, tanba durante ne’e estasaun GMN la hatudu sira-nia imparsialidade no apoiu liu kandidatu ida liufali kandidatu sira seluk iha kampaña ba eleisaun Prezidente Repúblika. 

Ekipa Susesu  kestiona CNE nia imparsialidade hili estasaun televiziva GMN ba transmisaun direta debate Prezidente Repúblika nian. Maibé ne’e la signfika kandidatu Prezidente Repúblika Francisco Guterres Lú Olo sei la partisipa iha debate ne’e. 

Kandidatu Prezidente Repúblika Francisco Guterres Lú Olo sempre prontu atu hato’o nia kompromisu polítiku iha oportunidade  neébe de’it atu nune’e eleitor hothotu iha Timnor-Leste tomak  no iha rai-liur,  bele akompaña no hatene kandidatu ninia kompromisu polítiku ba tinan lima tuir mai. 

-------------------------------------

Atu hetan informasaun liután bele kontaktu Fernando dias Gusmão  77999570.