info@fretilin.tl 3313017

Deklarasaun Imprensa husi reprezentante ba Kandidatu no. 6 ba Prezidente Repúblika, Francisco Guterres Lú Olo

  • Publika husi: Medialuolo
  • Fatin no Loron: Dili, 03/Mar/2022

Sai Prezidente da Republika ne’e tenke sai Prezidente ba ema hotu. Kandidatu ba Prezidente Ramos Horta , iha nia kampana , iha Lospalos, 2 Marsu, halo atake ba Presidente da Republika Fransisco Guterres Lu-Olo, nudar kandidatu ba Presidente da Republika ba periodu 2022 – 2027.

 

Horseik, Kandidatu Jose Ramos Horta   hatete:

 

1.Krise la hahu husi Lecidere Ramor Horta nia uma, Xanana nia uma,  maibe hahu husi Camarada Lú-Olo wainhira la f posse ba CNRT nian nain 8 no KHUNTO nian nain 2.

 

Deklarasaun  ida ne’e falsa no la iha baze. Ko’alia loos, tuir faktus, krize   hahu hosi inkapasidade CNRT nian atu jere no mantein sira-nia  kompromissu ne’ ebé kesi sira nu’udar  Aliansa Maioria Parlamentar (AMP) , molok eleisaun antesipada, halo iha 12 maiu 2018. Ho Aliansa, entre CNRT, PLP no KHUNTO, mak sira manán eleisaun antesipada  no  hetan direitu  atu hili Primeiru-Ministru Taur Matan Ruak,  hodi lidera VIII Governu.

 

Nu’ udar Primeiru-Ministru indijitadu husi AMP,  Jeneral Taur Matan Ruak hato’ o

proposta  lista naran   ho ida-idak ninia knaar iha  VIII Governu . Tuir Konstituisaun haruka,  Primeiru-Ministru tenke  hato’ o proposta ne’ e  ba Prezidente Repúblika.  Hafoin simu proposta husi Primeiru-Ministru, Prezidente Repúblika iha kbiit konstitusionál  atu tetu no deside nomeia ka la nomeia membru sira ne’ ebé propoin husi Primeiru-Ministru. Bainhira nomeia ona, Prezidente Repúblika haruka publika Dekretu nomeasaun iha Jornal Repúblika no fó posse.

 

Hakarak haklaken ohin  ba media no públiku tomak  katak mosu polémika tanba  lia fuan “proposta”  temi iha ita-nia Konstituisaun. Lia fuan ne’ e  signifika katak Primeiru-Ministru  hato’ o  naran maibé ne’ e la’ós ona desizaun  atu Prezidente simu de’ it.  Prezidente la’ os atu tau deit karimbu,

La nomeia membru ruma ne’e,  mandatu konstitusional Prezidente  nian.  Tuir Artigu 86, no númeru 2 artigu 106 Konstituisaun nian,  hateten katak Prezidente Repúblika mak iha kompeténsia nomeia no ezonera membru Governu tuir proposta husi Primeiru Ministru.

 

Iha enkontru dahuluk ho AMP ba formasaun VIII Governu, hafoin Tribunal Rekursu fó-sai rezultadu eleisaun antesipada, PR fó mensajen klaru katak sei defende integridade estadu nian. Tuir loloos,  se AMP mak iha intensaun di’ak no defende boa governasaun, tetu kedas mensajen PR nian iha selesaun membru Governu hodi la inklui membru Governu ne’ebé públiku kestiona maka’as kona-ba sira-nia kredibilidade.

 

Buat ne’ebé PR labele mak halo nomeasaun bainhira laiha proposta husi PM. Iha kazu,  bainhira PR no PM la konkorda malu kona-ba proposta nomeasaun husi PM, Konstituisaun fó dalan ba PR no PM atu uza  sira-nia relasaun polítiku-institusionál hodi hakotu sira-nia diverjénsia. Solusaun ba diferensa hanoin  la’ós depende ba partidu polítiku sira iha PN. Se la rezolve, PR iha kbiit atu la  halo nomeasaun ba kandidatu membru governu  propostu husi PM.

 

Prezidente la simu proposta ba membru governu husi Primeiru-Ministru laos akontese deit iha mandatu Prezidente Lu-Olo  nian maibe akontese tiha ona iha Presidente Taur Matan Ruak nia mandatu. Karik kandidatu Ramos Horta haluha ona, Prezidente Taur Matan Ruak la simu  proposta husi  Primeiru-Ministru  Xanana atu nomeia no fó pose ba senhora Domingas Fernandes Alves, nu’udar ministra Defeza.  Formasaun II Governu, Fretilin mai ho proposta Primeiru Ministru, maibe Prezidente Republika Xanana Gusmao la nomeia Primeiru Ministru ne’ebe propoin husi Fretilin. Fretilin kumpre de’it tanba  nomeia no ezonera nu’udar knaar Prezidente Republika nian.

 

Krize ne’ebe Ramos Horta refere horseik  la  iha fundamentu.  Krize instutusional ne’ebé hahú bainhira Orsamentu xumba iha Parlamentu Nasional la sai grave tanba Prezidente Repúblika buka dalan liuhsi diálogu no Primeiru-Minstru rasik dada fila fali ninia pedidu rezignasaun. Sira nain rua tetu hamutuk  situasaun impase politiku, impaktu husi  krise sanitaria no  mos husi  kalamidade. Sorte bo’ot Timor-Leste iha Presidente Fransisco Guterres Lu-Olo, Presidente ida mak hatene jere situasaun krise ne’ebe akontese no konsege mantein paz no estabilidade polítika no  governativa , no mos garante serbisu publiku sira governo halo nafatin  hodi atende publik nia nesesidade  iha momentu ita hasoru pandemia no mos dezastre natural.

 

2. Kandidatu Ramos Horta hatete horseik :

“Loloos PM hatama rezignasaun PR tenke aseita, halo koligasaun foun no disolve PN”.

 

Kandidatu Jose Ramos Horta nia hakarak ne’e Presidente boneku ida mak lidera RDTL atu halo tuir deit ka tau karimbu deit ba proposta governo nian. Prezidente Republika Francisco Guterres Lu-Olo laos ema nia boneku no nunka hakarak sai ema ida nia boneku. Prezidente Lu-Olo halo tuir deit saida mak konstituisaun no lei husu no halo tuir no respeita vontade  Povu nian no tenke garante funsionamentu instituisaun estadu nian.

 

Koligasaun AMP ne’ebé naksobu la implika katak governu harri ona  tenke  monu. “CNRT baku mate AMP” ne’ e lia fuan husi Primeiru-Ministru TMR rasik  bainhira orasamentu xumba iha Parlamentu Nasional.  Depois harahun tiha kompromisu ho  AMP , partidu  CNRT hakarak forma fali governu foun liuhusi koligasaun foun.   

Tanba CNRT mak baku mate AMP, la iha garantia ba PR atu fó konfiansa ba  koligasaun foun ne’ e.

 

Kondisaun ba  governu atu monu mak hakerek tiha ona iha Konstituisaun artigu 112:Lejislatura foun   foin hahú, PM inkapasidade permanente/mate, PR aseita PM nia pedidu de resignasaun, rejeisaun programa governu dala rua tutuir malu, votu konfiansa la hetan aprovasaun iha PN, votu konfiansa passa iha PN.  

 

Konstituisaun la hateten katak PR tenke aseita pedidu demisaun Primeiru Ministru nian no la fó prazu ba PR atu foti desizaun kona-ba pedidu demisaun husi PM. PR laiha obrigasaun atu aseita pedidu demisaun PM ninian. Realidade iha PN akontese katak votasaun ba estensaun Estadu Emerjénsia ho votus afavor 35, ne’e hatudu katak iha mudansa koligasaun foun iha PN. KHUNTO rasik deklara firme ho pozisaun polítiku fó apoiu tomak ba Taur Matan Ruak kontinua sai Primeiru Ministru.

 

Momentu ne’eba se Presidente Lu-Olo simu rezignasaun PM nian signifika demite governu. Iha tempu hanesan ita nia rai hasoru hela dadaun pandemia  COVID-19. Ita hotu bele iha serteza katak PM foun bele fasil atu  hili iha koligasaun laran no koligasaun foun sei garante katak sei iha estabilidade no funsionamentu normal instituisaun estadu.

 

3. Meja rahun iha PN nee harahun demokrasia tamba Jose Ramos Horta moe haree hahalok sira nee.

 

Se mak halo rahun meja Prezidente Parlamentu Nasional? CNRT nia deputadu mak halo rahun meja Prezidente Parlamentu Nasional. Bele haree video sira mak espalla lemo-lemo iha media sosial. Ramos Horta tenke moe duni tan ida halo rahun meja Prezidente Parlamentu Nasional ne’e mak agora apoio Ramos Horta hodi kandidata an ba Presidente da Republika.

 

Tuir Konstituisaun artigu 99 númeru 4, PPN iha obrigasaun atu konvoka reuniaun bainhira deputadu sira liu 1/3 hato’o pedidu reuniaun nian, maibé Arão Noe nunka konvoka reuniaun ne’e no uza de’it artigu 99 númeru 3, reuniaun ordinária PN nia hala’o bainhira Prezidente Parlamentu Nasional konvoka hodi ignora artigu 99 númeru 4 ba reuniaun estraordinária sira. Rejimentu PN, artigu 16-B, númeru 2, pedidu destituisaun, ho justifikasaun loloos, aprezenta husi deputadu pelumenus na’in-10 no halo ajendamentu ba votasaun pedidu destituisaun iha prazu másimu loron-lima nia laran. Arão Noe la konvoka reuniaun viola Konstituisaun no Rejimentu PN nian.

 

Semana hirak antes ne’e, Bankada PLP, KHUNTO no FRETILIN hatama ona rekerimentu atu halo plenária kona-ba destituisaun, maibé Arão Noe la aseita rekerimentu destituisaun nian.

 

Deputadu na’in-33 husi Vise Prezidente Parlamentu Nasional, Angelina Sarmento no Luis Roberto da Silva konvoka plenáriu PN. Plenáriu hahú no deputadu hamutuk na’in-36 aprova sesaun plenária ba 19 maiu 2020. Liuhusi votu sekretu deputadu na’in 36 aprova destituisaun Prezidente Parlamentu Nasional Arão Noe no liuhusi votu sekretu deputadu na’in-40 hili PPN foun Aniceto Guterres.

 

Iha19 maiu 2020, iha lokraik,  Arão Noe husu fiskalizasaun abstrata  ba konstitusionalidade destituisaun no eleisaun Prezidente Parlamentu Nasional foun. 

 

Iha data hanesan, hafoin destituidu, Arão Noe hakerek karta ba Prezidente Republika ho kargu  Prezidente Parlamentu Nasional husu Prezidente Republika atu dissolve Parlamentu Nasional.

 

Iha 28 maiu 2020, Tribunal Rekursu rejeita pedidu Arão Noe nian tanba bainhira husu fiskalizasaun abstrata la’ós ona Prezidente Parlamentu Nasional no destituidu ona. Tribunal Rekursu mós hateten katak konfiansa polítiku husi deputadu mak sai baze ba eleisaun Prezidente Parlamentu Nasional.

 

12 juñu 2020, Tribunal rejeita petisaun no hateten katak alterasaun aliansa maioria foun sai baze ba kompoziasaun meza no Prezidente Parlamentu Nasional.

 

Tribunal Rekursu la hateten destituisaun no eleisaun PPN viola Konstituisaun. Termu violasaun konstituisaun  ne’e CNRT mak fabrika.