info@fretilin.tl 3313017

PROGRAMA HADI’AK POVU NIA MORIS SEI BURAS LIU HO VIII GOVERNU NO LÚ OLO

  • Publika husi: Medialuolo
  • Fatin no Loron: Viqueque, 08/Apr/2022

Viquque, 8 abril 2022

Sekretáriu Jerál Fretilin Mari Alkatiri hateten katak programa atu hakbiit povu sei sai buras liu ho VIII Governu Konstitusionál ho nia Prezidente Repúblika Francisco Guterres Lú Olo.


Sekretáriu Jerál Fretilin Mari Alkatiri hato’o deklarasaun ida ne’e iha diálogu kandidatu Prezidente Repúblika Francisco Guterres Lú Olo nian iha Viqueque. Mari Alkatiri hateten katak VIII Governu Konstitusionál nia programa mak atu hakbiit povu.


Governu atu harii tan polu dezenvolvimentu foun, inklui iha parte leste ninian. Zona dezenvolvimentu aseleradu. Presiza halo dezenvolvimentu ida la’o lalais, maibé ekonomia sosial merkadu sai polítika nasionál ba dezenvolvimentu. 


Programa VIII Governu Konstitusionál nian ne’ebé la’o ona hodi hakbiit Povu mak Uma Kbiit-Laek, iha tinan kotuk harii ona 1342 no tinan ne’e harii tan 5000, estrada rurais la’o ona iha zona osidental nian, apoiu veteranus 24 anos halo uma, kréditu ba pequena empreza, kréditu suave, sesta bázika atu insetiva produdaun no ekonomia, hasa’e subsídiu ba xefe suku no xefe aldeia, empregu ba traballadór temporariu iha suku, rehabilitasaun sede suku, komputadór no printer ba suku no reativasaun organizasaun arte marsiais.


Ba oin sei halo tan programa abitasaun, uma ba povu. Sei kontinua programa uma ba kbiit la’ek, hadi’ak povu nia uma ne’e lahó kondisaun, uma ba sidadaun ne’ebé laiha uma.


Programa ne’ebé Primeiru Ministru lansa ona mak iha fulan dezembru 2022 uma kain ida-idak sei simu subsídiu $200 ba sira ne’ebé la hetan desimu terseiru més. Tenderizaun eletrisidade ba suku 33 ne’ebé seidauk hetan naroman hala’o tiha ona. 


VIII Governu Konstitusionál lideradu husi Taur Matan Ruak sei harii Fundu ho valór osan $ 1 biliaun atu tau matan ba nesesidade povu nian, inklui ba veteranus.

Modelu dezenvolvimentu ida ne’ebé Governu hakarak harii mak:


“Dezenvolvimentu justu, ekilibriu, balansu entre sosial no ekonómiku.  Dezenvolvimentu labele hateke de’it ba uma furafurak, estrada furafurak. Sosial importante. Saida mak garante estabilidade nasionál mak dezenvolvimentu sosial hamutuk ho ekonomia,” Mari Alkatiri hateten.


Modelu foun dezenvolvimentu konetividade tenke iha uluk. Ligasaun tenke uluk  atu ema bele ba mai.


Sekretáriu Jerál Fretilin no koordenadór Plataforma PLP, KHUNTO no Fretilin husu sidadaun atu koopera ho projetu husi estadu tanba dalabarak maske orsamentadu ona maibé labele ezekuta tanba veteranu ho veteranu mak hadau malu fali.


Projetu Beasu derepente de’it Xanana Gusmão hakarak muda fali ba Natarbora sem informa Governu no Prezidente Repúblika.  Maibé Governu agora halo konsultasaun ho populasuan iha Beasu no konkorda fó rai atu harii Projetu LNG iha  Beasu maibé solusaun seidauk iha tanba akordu ne’ebé halo ho Australia kesi ita hotu.


“Solusaun mak seidauk iha tanba Australia ne’ebé halo ho Australia ne’e kesi ita. Ita manán ita-nia soberania maibé kesi ita tomak. Atu lori kadoras mai Timor-Leste Australia tenke dehan sim. Se Australia dehan lae. Halo nusa mós ita la lori? Ne mak soberania? Dehan ho Akordu foun, ita dehan fronteira, soberania. Maibé kadoras mai Timor-Leste ita hetan de’it 70 %. Se ba Australia, ita hetan 80%. Antes, akordu uluk ne’e, seidauk iha fronteira, seidauk iha soberania,  ba Australia ita hetan 90 %.  Ita iha fronteira mak ita hetan menus, lakon fali. Selu de’it advogadu sira akompaña Xanana ba negosiasaun liu $40 miloens,” Mari Alkatiri hateten. 


Hasai $ 650 juta husu Orsamentu Jerál Estadu, balun dehan sosa saham. 


“Ita Sosa partisipasaun kompania rua ne’e.  Ne’e hanesan Imprestimu estadu fó fali ba Timor Gap, tinan-tinan tenke selu funan. Loloos sira-nia partisipasaun la liu $150 maibéé ita selu tiha 650, husu ba Xanana $500 juta ba ne’ebé? Haksolok $14 juta.   $ 500 ba sosa sasan besi tua hotu iha tasi-laran mós ita sosa hotu,” Mari Alkatiri hatutan.


Relasiona ho ró Haksolok, Mari Alkatiri hateten:

“Solusaun Haksolok hetan. Estadu kontrola estalleiru Coimbra 95 %, Timoroan barak sei ba atu aprende atu harii estalleiru ida iha Timor.” 


Mari Alkatiri hateten ema barak foka de’it ba ró Haksolok ho valór osan $ 14 miloens maibé haluha tiha problema Tribunal iha Melbourne, se ita lakon sei selu multa to’o $ 500 miloens. 


“Husu ba sira, problema Tribunal Melbourne foti osan husi ne’ebé atu selu.”


Mari Alkatiri sei hakerek karta ba  Xanana Gusmão atu promove reuniaun balansu ba tinan-20 depois restaurasaun. Saida mak halo ida-idak halo entre lideres primeira jerasaun, segunda jerasaun, terseira jerasaun no kuarta jerasaun.