info@fretilin.tl 3313017

Dr. Francisco Guterres Lú Olo ho Dr. Mari Bin Amude Alkatiri re-eleitu Nu’udár Prezidente no Sekretariu Jeral FRETILIN iha V Kongressu Nasional

  • Publika husi: Webadmin
  • Fatin no Loron: CCD, Dili, 09/Sep/2022

Dili 09-09-2022
KOMUNIKADU IMPRENSA
Dr. Francisco Guterres Lú Olo ho Dr. Mari Bin Amude Alkatiri re-eleitu Nu’udár Prezidente no Sekretariu Jeral FRETILIN iha V Kongressu Nasional.
Frente Revolusionaria Timor-Leste Independente (FRETILIN) hahú V Kongressu Nasional ohin, loron-8 fulan-Setembru tinan-2022 iha Sentru Konvensaun Dili (CCD). Kongressu Nasional Dalima ne’e partisipa husi delegadu hamutuk nain 985 husi rejiaun no munisipiu sira hotu.
Loron dahuluk Kongressu nian, haktuir ba rekezitu estatutoriu no rejimentu Kongresu Nasional nian, ne’ebé aprova husi Komite Sentral FRETILIN no komfirma iha Kongressu, kongresista sira aprezenta pakote rua ne’ebé atu kompete iha eleisaun lideransa FRETILIN nian. Durante prosesu verifikasaun ne’ebé Komisaun Verifikasaun Poder Kongressu nian hala’o, proponente sira husi pakote ida husi pakote rua ne’ebé aprezenta, retira sira nia pakote, nune’e pakote ida deit mak kontinua no ikus mai prienxe kriteria atu kompete.
Kona-ba oinsa atu hili Prezidente no Sekretariu Jeral FRETILIN iha Kongressu, Rejimentu Kongressu Nasional nian ne’ebé Komite Central FRETILIN aprova, Art. 12 aliena 3.b hatete katak “Lista ida tenki mai husi pelomenus 20% delegadu kongressu nian, fahe proporsionalmente tuir reprezentatividade geográfika, delegadu 10 kada munisipiu/reziaun, eseptu Atauro ho delegadu 5”
Lei Sobre Partidu Polítiku sira númeru 3/2004 ne’ebé mak altera ho Lei Númeru 2/2016, rekere lideransa topu partidu polítiku sira so bele eleje liu husi eleisaun sekreta. Artigu 18 pontu c husi Lei Nú. 2/2016 hatete katak “Titular sira orgaun diresaun nian so bele eleitu, liu husi votu direitu e skretatu husi filiadu sira hotu ka assembleia ne’ebé reprezenta sira.”
Tuir termu Lei ida ne’e, kongressista sira ne’ebé iha direitu ba vota, ezerse sira nia direitu no liu husi eleisaun sekretu, diretu no universal re-eleitu Dr. Francisco Guterres Lú-Olo ba kargu Prezidente FRETILIN no Dr. Mari Bin Amude Alkatiri ba kargu Sekretariu Jeral FRETILIN. Total votus afavor ba pakote ida hamutuk 764, vota kontra hamutuk 106 no vota nullu hamutuk 47. Husi kongresista sira ho direitu votu, delegadu nain 917 mak vota iha eleisaun ba lideransa.
Prezidente FRETILIN no Sekretariu Jeral FRETILIN eleitu toma pose iha loron-9 fulan-Setembru tinan-2022 iha Kongressu Nasional nia oin.
Hafoin tomada de pose, Prezidente FRETILIN Dr. Francisco Guterres Lú-Olo hatete, “FRETILIN sai partidu ida ne’ebé mak metin, ho vizaun no misaun klaru ba Timor-Leste nia futuru atu lori naroman ba povu.”
Entretantu, koalia kona-ba rezultadu eleisaun ba lideransa FRETILIN iha Kongressu, Dr. Lú-Olo esplika katak “prosesu eleisaun ne’e prosesu internal FRETILIN nian. Ne’e demokrasia no iha FRETILIN, laiha ida mak lakon laiha ida mak manan.”
Kongressu Nasional FRETILIN hala’o husi loron-8 to’o loron-10 fulan-Setembru tinan-2022.
REMATA
Ba Informasaun liu tan, halo favor kontaktu Gabinete Komunikasaun Sosial FRETILIN iha: gabinetekomsos.fretilin@gmail.com