Akordu kompromisu pre-eletorál ne’e asina iha Díli husi Sekretáriu Jerál FRETILIN Mari Alkatiri, Prezidente PLP Taur Matan Ruak no líder másimu KHUNTO José Naimori. Partidu polítiku ne’ebé iha kadeira 36 iha Parlamentu Nasionál ba eleisaun lejislativa ne’ebé sei hala’o iha 21 Maiu 2023  deside atu la’o ketak-ketak no sei hamutuk hodi hetan maioria iha Parlamentu Nasionál ba formasaun IX Governu Konstitusionál.

Partidu polítiku tolu ne’ebé iha ezekutivu hato’o sira-nia kompromisu pre-eletorál tanba haree ba esperiénsia durante tinan 3 ukun hamutuk ne’ebé  FRETILIN viabiliza VIII Governu konsege sai husi krize polítika,  susesu hala’o nia programa hodi servi povu no asegura estabilidade polítika no governativa

Iha akordu kompromisu ne’e hateten katak depois viabilizasaun Governu ho lideransa Primeiru Ministru Taur Matan Ruak, iha diferensa boot nu’udar governu ho baze ida luan liu ho apoiu parlamentár ne’ebé inklui mós bankada partidárias seluk aleinde bankada husi Plataforma de Entendimentu, iha aprovasaun atos ho karáter estruturante ne’ebé afavor ba reforsu no konsolidasaun estabilidade governativa.

Akordu kompromisu pre-eletorál loke dalan ba inkluzaun luan liután liuhusi konvida bankadas husi partidu polítiku seluk atu hamutuk ho Plataforma de Entendimentu.

Prezidente PLP no atuál Primeiru Ministru, Taur Matan Ruak,  iha ninia intervensaun relasiona ho akordu kompromisu ne’e hateten:

“Hamutuk ne’e hahú di’ak ida. Manter uniaun ne’e progresu no serbisu hamutuk ne’e vitória.”

Akordu ne’e hatur liña orientasaun programa polítiku ba oin mak foka ba dezenvolvimentu integradu, inkluzivu no sustentável.

Taur Matan Ruak nu’udar Primeiru Ministru hato’o susesu husi VIII Governu nian:

“Jere impaktu krize labele haterus ita-nia povu, luta ba kreximentu ekonómika ho rekuperasaun ekonomika, reformas ne’ebé hala’o, fundamentalmente reformas finansas públikas, hasai transparénsia no responsabilizasaun no lei sira ba diversifikasaun ekonómika ne’ebé sei integra organizasaun rejionál hanesan ASEAN.”

Koordenadór Plataforma ba Entendimentu no atuál Sekretáriu Jerál FRETILIN, Mari Alkatiri hateten:

“Ha’u nunka tama iha kampaña ho konviksaun katak ita manán tiha ona.”

Sekretáriu Jerál FRETILIN hatutan katak konviksaun ne’e mai tanba haree ba plataforma ne’ebé kontinua buras no metin babeibeik. Maibé, husu ba partidu polítiku ida-idak atu serbisu maka’as liután hodi konsolida no asegura Plataforma liuhusi partidu polítiku idaidak servisu mesak tanba iha eleitór rasik no presiza iha kapasidade rasik atu manán.

“FRETILIN, hamutuk ho PLP no KHUNTO mak sei forma IX Governu,” Sekretáriu Jerál FRETILIN hateten.